Salve, caput cruentatum,

Totum spinis coronatum,

Conquassatum, vulneratum,

Arundine verberatum,

Facie sputis illita.

Salve, cujus dulcis vultus,

Immutatus et incultus,

Immutavit suum florem,

Totus versus in pallorem

Quem coeli curia.

Omnis vigor atque viror

Hinc recessit, non admiror,

Mors apparet in aspectu

Totus pendens in defectu,

Attritus aegra macie.

Sic affectus, sic despectus,

Propter me sic interfectus,

Peccatori tam indigno

Cum amoris intersigno

Appare clara facie.

In hac tua passione,

Me agnosce, Pastor bone,

Cujus sumpsi mel ex ore,

Haustum lactis cum dulcore,

Prae omnibus deliciis.

Non me reum asperneris,

Nec indignum dedigneris,

Morte tibi jam vicina,

Tuum caput hic inclina,

In meis pausa brachiis.

Tuae sanctae passioni

Me gauderem interponi,

In hac cruce tecum mori:

Praesta crucis amatori,

Sub cruce tua moriar.

Morti tuae tam amarae

Grates ago, Jesu chare;

Qui es clemens, pie Deus,

Fac quod petit tuus reus,

Ut absque te non finiar.

Dum me mori est necesse,

Noli mihi tunc deesse;

In tremenda mortis hora

Veni, Jesu, absque mora,

Tuere me et libera.

Cum me jubes emigrare,

Jesu chare, tunc appare:

O amator amplectende,

Temetipsum tunc ostende

In cruce salutifera.

Und die ganzen Membra Christi findet ihr hier .

Und auch wenn der liebe Kollege (im Anschluß an Migne´s PL 184) das behauptet, es ist natürlich nicht von Bernhard von Clairveaux sondern von Arnulf von Löwen.